Parkingmeter

«Bim ne Parkingmeter ha-ni mis Outo wölle lah, aber ha kes Zwänzgi gha für bim Gäldschlitz inezlah.»

So faht das Lied «Dr Parkingmeter» vom Mani Matter aa. Är beschribt de witer, wie är zur Poscht hät wölle, für nes Zwänzgi lah z wächsle, aber äbe nid het chönne, wül är ds Auto ja nid het dörfe la stah. Das Lied geit guet ei Minute lang.

Mängisch chunnts mir i Sinn, weni ds Outo wett parkiere. Rächtmässig. Ohni Parkbuessrisiko uf mi ds näh. Das isch ja sowiso afe kompliziert. Mängisch muess me luege, weles Nummero dass der Parkplatz het, für de a der Parkuhr iiztippe, wo dass me ds Auto ganz genau het häregstellt. Vergisst me z luege bim Usstige, louft me halt no chli hin und här.

Oder es git die Parkuhre wo ds Autonummero wei wüsse. Ds ganze natürlech, die erschte drei Zahle länge nid (aber die chönnti drum afe) und inklusive BE, süsch funktionierts natürlech o nid. Ig bi o scho zur Parkuhr underwägs gsi, ha uf halbem Wäg umkehrt für ds Autonummero nomal ga z luege, bi bir Parkuhr acho und häts no gwüsst! Aber die hets nid wundergnoh, sondern het nachem Parkplatznummero gfragt… Bi gloub nid die erschti gsi wo hin und här gloffe isch, es het ömel scho Spurillen gha am Bode.

Ig weiss nümm, wär das isch gsi wo mi das gfragt het bim Lehre für d Outoprüefig: «Was si eigentlech Spurillen?», und ig ha kei Ahnig gha. Ha scho dänkt, die würde mir uf all Fäll der Fahruswiis wieder näh wesi wüsste, dass ig nid nume bir Vortrittsregelig nümme sicher Bscheid weiss und ds sitwärts Ineparkiere scho lang vermide, sondern ono kei Ahnig ha, was Spurillen si! Bi de sälber ga läse und ha gseh, dass no e «r» meh het. Was «Spurrillen» si, hani ömel de chönne erkläre. Zrügg zum Parkplatz: Hüt würd em Mani Matter sis Zwänzgi ja niene meh häre länge, e Parkplatz z bruche choschtet meischtens meh. Aber vorallem chames niene meh inelah, so nes Zwänzgi. Es het chuum meh Parkuhre mit Gältschlitze. Und o keini Parkuhre meh mitem Kläppeli wome im Verbiigah hurti cha inerecke und gspüre, ob düregheits Münz drinne ligt. Miner Jungs si öpedie strahlend vom Schuelwäg heicho und heimer stolz es Füfzgi zeigt wo sie als erschti heige entdeckt hinderem Kläppeli ar Parkuhr. Das isch jetz verbii. Hüt chame oder muess me d Parkplatzbenützig online zahle. Agfange hets mitem Sepp. Also mit däm App wo Sepp het gheisse. Ha mi lang dergäge gwehrt. Mi het dünkt das göng weder Greti no Pleti no Sepp öpis aa, wenn dass ig wo weles Auto härestelle und wie dass ig zahle. Chuum hani nahgäh gha, (bi denn eifach z fuul gsi, 200 Meter (respektive 400 mitem Rückwäg) zur Parkuhr z loufe. Ha denn lieber das App abeglade füre Parkplatz z zahle.

So tueni o bi andere Sache: Statt im Telefonbuech z luege nimeni ds Handy füre, statt im Chochbuech z sueche, findeni Rezäpt im Internet, statt zum Fänster uus, luegeni uf ds Wätterapp (ja, isch mir grad chli piinlech) und äbe, o füre Parkplatz hani vo denn aa ds App ufem Handy brucht.) äbe: Churz druuf isch das Sepp App gäge «pay by phone» usgwächslet worde.

Und das geit jetz eso:

Für mis Outo hie lah z stah, muessi zersch es update ha

und für nes update z ha, sötti Lieblingsföteli la gah, wüli z weni Spicher ha.

Wenn ig die Föteli de ha, i Papiirchorb übere ta, und wieder «genügend Speicher» ha,

chani das update mache lah. Mitem upedate da, chani ds App installiera

und das wott wüsse ob i ha, immer ds gliiche Auto da.

Marke isch Skoda, Typ Octavia,

ds Nummero? Muessi wieder ga luege gah und de tippeni uf «ja».

De scrolleni dernah, uf die Koordinata

und wo dass ig jetz gnau stah und wett de äntlech gah.

Aber ds App isch no am lada und wott no wüsse ob ig im Sinn ha,

chürzer oder länger z ha -

ig schetze i vierzg Minuta, bini de wieder da, gibes ii und meine i dörf jetz gah.

«Twint oder Kreditcharta?», fragt ds App, und ig tippe mi Code woni (zum Glück no) cha

und darf äntlech ds Auto eleini lah.

Ds App fragt mi de hie und da, ob ig wett verlängere oder lah,

aber i mälde mi de scho, weni sött länger ha und o weni wieder möchti gah.

Und de blibt mir no eis Dilemma:

Was mache, weni keini «mobile Daten» ha?

Mängisch würdi würklech lieber eifach es Zwänzgi i Gältschlitz inelah.

Und ig bi sicher, der Mani Matter hätt 50 Jahr später sis Parkingmeterlied nid inere Minute fertig gha!

Alice Linder