Der Spatz Tschilpi, en Adväntskaländergschicht
Zum Inhalt:
Der Tschilpi isch e chline Spatz. Är isch weder muetig no fräch und jedesmal, wenn är erchlüpft, passiert ihm öpis sehr piinlechs! Vo de andere Spatze, wo äbefalls bim Palascht vom König Herodes wohne, wird der Tschilpi hüfig usglachet.
Zum Glück lehrt der Tschilpi de d Vola kenne, e Vogel wo imne Chäfig iigsperrt isch und wunderbar cha singe!
Später begägnet der Tschilpi am ne Kamel wo mit drü Weise uf der Suechi isch nacheme nöie König. Was für ne bsunderi Überraschig erläbt äch der Tschilpi zletscht ds Betlehem imene Stall?
I dene 24 Kapitel vor Gschicht cha me mitverfolge wie d Fründschaft vom Tschilpi und der Vola wachst und wie useme ängschtliche Flatteri e muetige Spatz wird.
D Gschicht zeigt o, dass, sogar das, wo me meint es sig e Schwächi, sich als nützlich cha erwiise und dass mängisch o das, wo unmüglich schiint, cha wahr wärde.
Das Büechli eignet sich zum Vorläse, sälber läse, oder o für im Unterricht z verzelle.
Äs wärde verschideni Theme agsproche: Zum Bispil der Muet wo wachst bim Tschilpi und sis Sälbstvertroue. Ds Thema Mobbing chunnt vor und wie wichtig dass Fründschaft isch. Mängisch brucht öpis vil Geduld, bis me geht, dass es wachst und der Tschilpi erläbt, dass zwar nid jede Vogel gliich höch und gliich wit cha flüge, aber dass jede sini Qualitäte het.
Es het Kapitel wo drinne Gschichte witerverzellt wärde. Die hani nid sälber erfunde sondern eifach "dri-passt".
D Gschicht chame guet chürze, so dass me im Unterricht nid 24 Tag Zit brucht für se chönne fertig z verzelle. Sie laht sich guet la bruche, wenn me ds wiehnächtliche Thema vor "königliche Site wett belüüchte" und me chönnt guet scho im Novämber mit däm Thema/der Gschicht vom Tschilpi starte. Sie bietet gäbegi Aachnüpfigspünkt für d Vogelwält chli nächer lehre z kenne.
D Gschicht isch illustriert mit eire Bleistift-Zeichnig pro Kapitel.
Da geits zum "Schnupperkapitel".
