Der Samichlous bereitet sich ufe 6. Dezämber vor. Är het vil z tüe, aber usgrächnet i dene Tage passiere ihm e Huufe Missgschick. Är chunnt i Stress und wird fasch echli hässig. Oder spilt ihm vilech öper Streiche? Si Esel chas ja nid si, aber wär oder was bringt de d Routine vom Chlous derewäg dürenand? Was würklech los isch im Samichlousehuus, cha me i däm Büechli läse. Die 24 Kapitel verzelle vo de Vorbereitige ufe Chlousetag und warum, dass nid nume d Grittibänze das Jahr anders usgseh. Me erfahrt im Louf vo der Gschicht vo gnärvte Lüt wo während der Vorwiehnachtszit im Wald underwägs sy und für was und vo wäm, dass ihre Ärger cha brucht wärde.
Mit dere Gschicht möchti zeige, dass Gfüehl nid lätz sy, wül sie chöi eim Wichtigs lehre und ufzeige. Zum Bispil d Wuet isch e starchi Emotion, wo hüfig als «schlächt» empfunde wird. Drum het sie i däm Büechli e bsundrige Platz übercho. Sie darf und söll gspürt und useglah wärde. Sie git vil Energie und cha hälfe, Veränderige i Gang z gäh.
​
Die Gschicht eignet sich zum sälber läse, vorläse und o für d Adväntszit im Unterricht im Zyklus 1 z gstalte.
Es wärde underschidlechi Situatione beschribe wie und warum Wuet und Ärger chöi entstah und o wie dermit cha umgange wärde.
Sie bietet Gsprächstoff für über die Emotione z rede, se chönne z verstah und e guete Umgang dermit z üebe und z finde.
​​
Ig ha keini detaillierte Zeichnige vom Samichlous gmacht, wül mi dünkt, das Bild wo me vo ihm het, isch öpis ganz Individuells und Pärsönlichs.
Bi de Illustratione zu de einzelne Kapitel hani a Läbchuechegarnituure dänkt.
Mi Wunsch isches, dass die 24 Kapitel chli Humor und albe einisch es töifs Düreschnuufe chöi id Vorwiehnachtszit bringe.
