Ds Schäfli Fläckli, en Adväntskaländergschicht
Zum Inhalt:
Die Gschicht verzellt i 24 Kapitel es Stück Wiehnachtsgschicht us dr Sicht vom chline Schäfli Fläckli. Äs läbt mit sire Herde uf de Fälder bi Betlehem. Schnäll springe chas guet und zur Flötemusig vom Hirtebueb tanzet’s gärn. Dä cha zum Glück o guet mit dr Steischlöidere umgah, wenns nötig isch!
Ds Fläckli isch munter bis es fiischter wird. De fürchtet äs sich und isch froh, dass äs zum Grosischaf darf ga lige.
Ds Grosi zeigt am junge Schäfli d Stärne ir Nacht und hilft ihm, sini Angscht überwinde. Ds alte Schaf verzellt em Fläckli o vom nöie Stärn wo d Hirte druf warte, dass är ufgeit.
Imne Stall ds Betlehem erläbe die beide Schaf de ganz e bsundregi Nacht!
Das Büechli eignet sich zum Vorläse, sälber läse oder o für im Unterricht z verzelle.
Äs wärde verschideni Theme agsproche: Zum Bispil d Angscht wo ds Fläckli cha überwinde, ds schlächte Gwüsse wo ds Fläckli het, wüls öpis gmacht het, wo's nid hät sölle, ds alt wärde und Abschied näh isch es Thema und ds chline Schäfli erfahrt, dass äs genau richtig isch, eso wie äs isch. Dass Schafwulle öpis Kostbars isch und uf vilsitegi Art cha brucht wärde, chunnt ir Gschicht o vor.
D Beziehig vom Fläckli zu sim Grosi isch e wichtige Teil und ds Läbe vo de Hirte lehrt me chli kenne.
Ob ds Fläckli wiblech oder männlech isch, hani nid definiert. So chöi sich Buebe und Meitschi mit däm chline Schäfli glich guet identifiziere.
I einzelne Kapitel wärde vom Hirt oder vom Grosi Gschichte verzellt. Die hani nid sälber erfunde sondern eifach "dri-passt".
Die einzelne Kapitel löh sich guet lah chürze, so dass me im Unterricht nid 24 Tag Zit brucht für d Gschicht chönne fertig z verzelle.
D Gschicht isch illustriert mit eire Bleistift-Zeichnig pro Kapitel.
Da geits zum "Schnupperkapitel".
